నిశ్శబ్దపు సంగీతం

 ఏ శూన్యం కేసి అట్లా చూస్తున్నాను? వసంతం పుష్పించడం ముగించుకొని సెలవు తీసుకుందనా? వాడిన వ్యర్థమైన పువ్వుల భారంతో గుండె చతికలబడిందనా? నిర్నిద్రమైన నీలాకాశం కళ్ళు మూసుకుని నేలపైకి కృంగి పడిందనా? ఎందుకీ నిశ్శబ్దం నాలో???

నన్ను వదిలి వెళ్లి ఏకాకైన ప్రియుడు ఈ నిర్జనమైన వీధిలో తానొక్కడే... వస్తాడని, నా ఇంటి తలుపు తెరిచి ఉంచాను. కలవలే మాయమై జారిపోతే కన్నీటిని ఎవరితో పంచుకోను? ఉండుండి తలుపు తెరిచి చూస్తున్నాను, ఈ దారిలో ఎక్కడైనా ఎదురొస్తాడని. ఈ చీకటి చిక్కుల లోతుల గుండా ఎందుకీ నిశ్శబ్దం నాలో??

చీకటి మేలి ముసుగు కప్పినప్పుడు తామరాకులన్నీ తలవంచుకొని దగ్గరగా ముడుచుకున్నాయి, నిద్ర దేవికి నన్ను అర్పించుకుందామని దుప్పటి కింద దాక్కున్నాను. అతను వచ్చి నా పక్కనే కూర్చున్నట్లు, అతని స్వరం నా చెవుల మారి మ్రోగినట్టు, అతని పరిమళం నా చుట్టూ ఆవరించినట్లు, ఆ కలలోంచి లేచాను. నాలో నన్నిలా కలవరపరిచేది వ్యదేంటో నాకు తెలియడం లేదు. మండే ఈ తపనాగ్నిలో ఎందుకీ నిశ్శబ్దం నాలో?

క్షణికమైన విద్యుత్ కాంతి మేఘాలను కోసుకుంటూ మెరుపై మెరిసింది. అతని రాక కోసం రాయబారమా? ఇది. హృదయం తడుముకున్నాను. నా గదినిండా పేరుకున్న అతని ఆలోచనలు... నా గడియారం ముళ్ళు కదలకుండా అతని జ్ఞాపకాలు... మన సొప్పదు నాకు ఇవన్నీ ఉడ్చిపారేసేందుకు. 

మనుగడేది నాకు? నిన్ను కాదనుకున్నప్పుడు. నువ్విచ్చిన స్వేచ్ఛ నిన్నేదో ఆశించాలని అడగ గోరి ఆగిపోతోంది. అడగకుంటే నా హృదయం భాదిస్తుంది. అయినా విలువల్ని మించిన ఐశ్వర్యం ఉన్నవానివి, నా ప్రియ మిత్రునివి నిన్ను తప్ప మరెవరిని అడగను??

అద్దంలో నా రూపు నాకు దూరమవుతుంది మరి. ఏ మాటతో నన్ను ఎమర్చుకోను? నీ రూపమే నాకు మరలా మరలా తారసపడుతోంది. నా చుట్టూ నేను కట్టుకున్న ఈ ఊహల గోడలు బంగారు చువ్వలై నన్ను బంధిస్తూ ఉన్నాయి. అజేయమైన నా ప్రేమ శక్తి, ఈ ప్రపంచాన్నంతా బంధించి నిన్ను నాతో కలుపుతుందని, ఈ చరసాలలోనే ఎదురు చూస్తూ ఉన్నాను.

Thank you 🙏 

✍️ Bhagyamati.