ఇత్తడి రేకుల్లా...దగదగా మెరిసే కళ్ళున్న ఈ పుత్తడి బొమ్మను ఎవరు చేశారో గానీ, ఆ చూపు ఒంటికి తగిలితే ఒళ్ళు జిల్లుమని వణుకు వస్తుంది. ఆ కళ్ళు అధికార చిహ్నాలేమో! ఇంత అందమైన విగ్రహానికి. ఇవి పద్మ దళాలో లేక పద్మ పత్రాలో!?నల్లని వలపు దారాలను విసిరి గుండెను చుట్టుకుంటాయి. గుమ్మంలో పడక కుర్చీ వేసుకుని పడుతులెవరైనా పోతారా? పడవేద్దామా? అని ఎదురుచూసే కుర్రాళ్ళలా... ఆ కనుల వాకిట్లోనే కౌగిలింతల చూపులు సిద్ధంగా ఉంటాయి. కాసేపు అలా చూస్తూ ఉంటే... నీటి చుక్క అగుపడని ఎడారిలా ఉంటుంది. గొంతు ఆర్చుకుపోతుంది. చలికాలం కూడా ఎండ మండిపోతున్నట్టు ఉంటుంది.
నాభి నుండి పదియంగుళాల పైన నాకు పెద్దగా పనిలేని ఒక హృదయముండేది. నా శరీరంలోని జీవుడికి తప్ప నాకు పనికి రానిది. అప్పుడే ఈ ఉత్తముని చూపులు నా గుండెతో ఉత్తర ప్రత్యుత్తరాలు చేశాయి. ఏదైనను ఈ గుండెకు ఇన్నాళ్ళకి స్పందన కలిగింది. ఈ ఒక్క చూపు నా గుండెలోకి, నాడీమండలంలోకి, నా శరీరమంతా జీవం నింపింది. శ్రేష్టమైన ప్రేమను, అమృతత్వమును నింపింది, అంటే ఆజన్మాంతం సరిపడ శాశ్వత ప్రేమను నింపింది. ఇది ఎప్పటికీ విడిపోనిది అని నమ్మకం కలిగింది.
పూల ఒడిని దోచుకెళ్లిన తేనెటీగ సాక్షిగా ఆ కళ్ళు తేనె సంద్రాలు. ప్రపంచంలో ఎన్నెన్నో అందాలు ఉండగా నేను ఆ కళ్ళ దగ్గరే ఎందుకు ఆగిపోయానంటే? యుగాలుగా మా మనసుల మధ్య రాయబారం నడిపింది ఆ కళ్లే!. ఇతనిని చూడాలంటే కన్నులు, శిరస్సు ఆకాశాన్ని చూసినట్లే! పాదాలు మునివేళ్ళ మీద నిలబడాలి. ఈ అందరి కన్నా ఉత్తమమైన వాణ్ణి నాకిష్టమైన దేవుని పేరు పెట్టి "శివా" అని పిలుచుకున్నాను. శివుడంతటివాడు నాకు!. నా శిల లాంటి గుండెపై తన బొమ్మ చెక్కినవాడు. ఈ జీవంలేని శరీరంలో ఆ కనుచూపులతో స్పందనలిచ్చినవాడు. ఈ చూపులు నా కొంగున ముడి వేసుకుని నడిచెల్తుంటే... నా గమనం కొత్తగా ఉంటుంది. నా చీరె వెల పెరుగుతుంది. అందుకే... పెనవేసుకున్నాను నా కళ్ళతో తన కళ్ళని, నిజమైన జీవితపు సహచర్యం కోసం.
ఆ కళ్ళు నా కొత్త జీవితానికి ప్రేవేశ ద్వారాళ్లా ఉంటాయి. నన్ను నేను మెరుగు పరుచుకోవడానికి దేవుడిచ్చిన గొప్ప అవకాశం ఇది. ఇలా రాస్తూ మా స్నేహాన్ని తాజాగా గుర్తు తెచ్చుకోవటం గమ్మత్తుగా ఉంటుంది.
Thank you ☺️,
✍️ Bhagyamati.
బావుంది
రిప్లయితొలగించండిThank you 🙏
తొలగించండిGood
రిప్లయితొలగించండి